اٶزگه چیراغینا یاغ اولماق بسدیر

اٶزگه چیراغینا یاغ اولماق بسدیر

حٶرمتلی اوستاد، بٶیوک شهرییار´ا
بیر الیمده قلم، بیر الده کاغاز
خیالیم بویلانیر دامدان، دوواردان
باشیمدا یار باغین گزمک هاواسی
قاپیلار باغلیدیر، یول تاپیم هاردان

حاصارین دالیندا کٶنول وئردیییم
او یار بیر باغ سالیب، سویو بولوردان
هایواسی کهروبا، ناری یاقوتدان
تاغی فیروزه دن، دیوانی گولدن

ماوی ائیوانیندا ساز چالیر زٶهره
بوروجوندا یای چکیب، دایانیب کئیوان
لاییقی وار گیره م قصرینه من ده
قیللی پاپاغیملان، سینیق سازیملان؟

او بو ائحتیشاملا، بو طمطراقلا
قاپیسین اوزومه آچماسا نه وار
شاهلا رعییتین صٶحبتی توتماز
من بیر اوبالییام، اودور شهرییار

گره ک روخصت آلام حئیدربابا´دان
"یوخ" جاوابی بلکه منه وئرمه سین
بیر ده شهرییار´دان فرمانیم واردیر
"شاعیر بیر بیرینی اولور گٶرمه سین؟"

یوخ، من ده سهند′ه م، باشیم اوجادیر
ایچیمده سٶنمه یه ن عئشق آتشی وار
منده صفاسی وار گوللو باهارین
باشیمی توتسا دا قارا بولودلار

لاله لی چیچه کلی چمنلریمده
گلیب یورد سالسا دا چوبان-چولوقلار
یالواررام صفامدان اوز دٶنده رمه سین
شهرییار´ا لاییق "شاه یوردو"م دا وار

کٶنلوم هاواسییلا قول-قاناد آچیر
قاف قالاسین آلماق دئیه اوجالیر
قالخدیقجا بوی آتیر داش دووارلاردا
آلیجی ترلانیم یورولور، قالیر

دووارلار، دووارلار، پولاد اولساز دا
آلماز میشار اوللام، کسیب بیچه ره م
کولونگون بورج آللام فرهاد بابا´نین
بیسوتون اولساز دا، چاپیب گئچه ره م

دووارلار، دووارلار، یول وئرین گئچیم
وولقانام، نفسیم توفان قوپارار
بولودام، ساللانسا قاشیم-قاباغیم
آغلارام، عالمی سئللر آپارار

بیر الیمده اود وار، بیر الیمده سو
بیر اوزوم قاراقیش، بیری باهاردیر
دوستا، ایسته کلییه ایستی قوینوم وار
دوشمانا باخیشیم شاختادیر، قاردیر

ایچیمده بوغولور دادیم، هاراییم
نه دووار هاییما های وئریر، نه یار
نه داشدان سس چیخیر، نه ده قارداشدان
سانکی بوشلوقلاردا ایتیر دالقالار

بیلمیره م بلکه ده بو بیر خیالدیر
یا دا کی سئحردیر منی آلدادان
دئییرلر دیلبریم بولور قصرینده
داردادیر، آسیلیب تپه ساچیندان

سهند´ی قورخوتماز نه سارای، نه سئحیر
محببت دئییله ن بیر افسونوم وار
هم ایسم-ی اعظم´دیر، هم ایسم-ی شب´دیر
باغلی قاپیلاری اوزونه آچار

آچیلین، آچیلین باغلی قاپیلار
محببت نامینا، ایسته ک نامینا
ارییین، تٶکولون دمیر قیفیللار
کٶنول خاطیرینه، اوره ک نامینا

گلیر قولاغیما اینیلتیلری
بوردا بیر شئر داردا قالیب باغیریر
دوغرودان دا من بیر "مورووتسیز"ه م
قارداشیم داردادیر، منی چاغیریر

چکیلین، چکیلین، یول وئرین گئچیم
اوره ییم آلیشیب، آلوو ساچارام
شهرییار بوینونا زنجیر وورالار
چئینه ره م، گمیرره م، دارتیب آچارام

ایشله ییر قولوما دمیر پاخلالار
زنجیر قیجیقدیریر، سانجیر اتیمی
جان قارداش، هله لیک باغیشلا منی
دئیه سه ن اونوتدون اسارتیمی

عزیز شهرییار´یم، باغیشلا منی
اینجیمه، داریلما، فیکرین هاردادیر؟
مورووتسیز دئییل سنین قارداشین
آنجاق سنین کیمی او دا داردادیر

اٶزون دئمه دین کی بیزیم ائللرده
وکیل مووککیلین خرجینی چکه ر،
آنا عئشق اوجاغی سٶنمه سین دئیه
اوره ین اریده ر، چیراغا تٶکه ر؟

هر یانی بیلمیره م، بیزیم دییاردا
هئچ ده خیال دئییل، دوستلوق، محببت
آنجاق ایشیق ساچان ایستی گونه ش ده
بعضن بولود آلتدا گیزله نه ر، البت

نه بیلیم بلکه ده سولطانیم قارداش
ایشین عئیبی بیزیم اٶزوموزده دیر
همین بو ایلقارین دوشگونویوک بیز
گوناه یاددا دئییل، گوناه بیزده دیر

بیر اوووج کلکباز، قومارباز ایله ن
پاکباز اولموشوق، پاک اوتوزموشوق
مرد ایکن، نامرده رحم ائیله میشیک
ایندی نامردلره مٶحتاج اولموشوق

دٶولتلییه ساخسی لازیم اولاندا
ووروب سیندیرمیشیق اٶز کوزه میزی
چیخدیغیمیز قینی به یه نمه میشیک
بیز ائلی آتمیشیق، ائل آتیب بیزی

ائلیمیزه نه گون آغلامیشیق بیز؟
باغین شاختا ووروب، بوستانین یاریب
ائل بیزه نئیله سین، نه گون آغلاسین؟
آغزی اوچوقلاییب، دیلی باغلانیب

ایندی اولان اولوب، گئچدیلر گئچیب
جالانان سو بیر ده کوزه یه دولماز
دالدان آتیلان داش توپوغا ده یه ر
گٶز یاشی تٶکمکله ن یارا ساغالماز

بو گون من سهند´ه م، سن شهرییار´سان
گل باشین اوجالداق قوجا تبریز´ین
بیر کره یادلارین داشینی آتاق
چکه ک قایغیسینی اٶز ائلیمیزین

وفاسیز گوللرین اوستوندن اوچاق
قوناق صداقتلی ائل قوجاغینا
سٶنمه ز عئشقیمیزدن بیر پئیوند سالاق
ائلین شاختا وورموش گول بوداغینا

شاعیریم، دونیانی نئجه گٶرورسه ن
دوز یئییب، دوز قابین سیندیرانلار وار
قدیر بیله ن یارا جان قوربان ائیله
قدیر بیلمه یه نه حئییفدیر ایلقار

اٶزگه چیراغینا یاغ اولماق بسدیر
دوغما ائللریمیز قارانلیقدادیر
یانیب، یاندیرمایاق یادین اوجاغین
ائویمیز سویوقدور، قیشدیر، شاختادیر

دئمیره م، یانمایاق آلوولانمایاق
یانماسین، نئیله سین یازیق پروانه؟
یانمایاق وفاسیز یارین اودونا
یاناق ائلیمیزه، یاناق وطنه!

بیر یئرده قالماقدان داریلدیق، اٶلدوک
دوغما یوردوموزو دولاناق، گزه ک
ائل ایله ن آغلایاق، ائل ایله ن گوله ک
اینجیمیزی وطن ساپینا دوزه ک!

او عزیز دییاردا، دوغما شهه رده
شاعیری جوشدوران صحنه لر چوخ وار
نیسگیللری چوخدور دردلی تبریز′ین
بیری سن اٶزونسه ن، عزیز شهرییار!

بورج آلتیندا یاشاماق یاماندیر، قارداش
بورجلویوق، بورجلویوق هم من، هم ده سن
گٶر نه روزیگاردا، گٶر نه گونده دیر
شهرییار بسله یه ن بو ائل، بو وطن!

چکه ک شئعر توپون، هایدی، قارداشیم
سن حئیدر بابا′یا، من ده سهند′ه
شاعیرین سیلاحی نغمه دیر، سٶزدور
نغمه میز یاییلسین شهه ره، کنده

یازاق، هر میصراعیمیز بیر بایراق اولسون
حقیقت بایراغی، ظفر بایراغی
پارلاسین مایاق تک، یانسین چیراق تک
گله جک مایاغی، اومود چیراغی

ایندیلیک ضعیف بیر داملا اولساق دا
سوزوله ک، ییغیلاق، گٶل اولاق، آخاق
قاریشیق چایلارا، داشقین سولارا
دره لردن گئچه ک، دنیزه چاتاق

شیلتاق لپه لره قوشولاق، جوشاق
سوزه ک دالقالاردا سونالار کیمی
گون وورسون، یاغیشلی بولودا دٶنه ک
اوچاق، هاوالاناق دورنالار کیمی!

اسسین اوستوموزه سویوق کوله کلر
بوزاراق، توتولاق، قارالاق، یاغاق
سئل اولاق، آغنایاق اوجا داغلاردان
یئرلی قایالاری دیبیندن قازاق!

داغلاری قوپاراق، دره لر دولسون
کٶپوکلو سولاری جالایاق دوزه
یاشارسین قوروموش کوللاریم کٶکو
باهاری قایتاراق وطنیمیزه

چایلارا سد ووراق، ظولمه حد ووراق
حاقلارا تاپشیراق حاققی هر یئرده
قیسیر قومساللارا جومماسین سولار
زمیلر گٶز گٶیه تیکمه سین بیر ده

کسه ک عداوتین، کینه نین کٶکون
عئشقدن یئنی بیر قورولوش قوراق
مینه ک شاهابلارا، ایلدیریملارا
گئده ک اولدوزلارا، گونه شه قوناق

سحر بولاغینین آریداق گٶزون
ایشیقلار قایناسین، خارراخار آخسین
چیزینسین یالینجیق، چیلپاق مئشه لر
بو داغلار دٶشونه گول-چیچه ک تاخسین

سهند ده گول آچسین، حئیدربابا دا
اوزه رینده چادیر قورسون شهرییار
باخاق چیچه کله نه ن یوردا، شئعر یازاق
شاعیر ده بختییار، شئعر ده بختییار!

شاعیریم، یوبانما، یولدادیر کروان
قولاق آس، دونیادا گٶر نه بیر سسدیر
باغرینی سیخماسین آتیلان توپلار
قیریلان زنجیردیر، سینان قفسدیر

سهند