آذربایجان
کونلوم قوشو قاناد چالماز، سنسیز بیر آن آذربایجان
خوش گونلرین گتمیز مدام خیالیمدان، آذربایجان
وطن عشقی مکتبینده جان وئرمه یی اؤیره نمیشیک
استادیمیز دئییب هئچدیر وطن سیز جان، آذربایجان
بوتون دونیا بیلیر سنین عزتینله، قدرتینله
آباد اولوب، آزاد اولوب ملک ایران، آذربایجان
بیستون انقلابدا، شیرین وطن اوچون فرهاد
کولونگ چالمیش اؤز باشینا، زامان - زامان آذربایجان
یارب! ندیر بیر بو قده ر اورکلری قان ائتدیین
قولو باغلی قالاجاقدیر نه واختاجان آذربایجان
ائولادلاری نه واختاجان ترک وطن اولاجاقدیر
آیاغا دور، عصیان ائیله، اویان - اویان آذربایجان
بسدیر فراق اودلاریندان کول اله ندی باشیمیزا
قالخ آیاغا، یا آزاد اول یا تامام یان آذربایجان
شهریارین" اوره یی ده سنینکی تک یارالی دیر"
آزادلیق دیر منه مرحم، سنه درمان آذربایجان
قارداشلیق ‘یولداشلیق ‘ادبی باریش
من دئمیرم اوستون نژاددانام من
دئمیرم ائللریم ائللردن باشدیر
منیم مسلکیمده منیم یولومدا
ملت لر هامیسی دوستدور ‘قارداشدیر
چاپماق ایسته میرم من هئچ میللتی
نه دیلین نه یوردون نه ده امگین
تحقیر ائله میرم من هئچ میللتی
گئچمیشین ایندی سین یا گله جگین
من آییرمیرام آیری سالمیرام
قارداشی قارداشدان آروادی اردن
آنانی بالادان اتی دیرناقدان
پوزماق ایسته میرم من بیرلیکلری
اینسانلیق بیرلیگی ایده آلیم دیر
قارداشلیق یولداشلیق ادبی باریش
دونیادا ان بویوک آرزولاریمدیر
آنجاق بیر سوزوم وار من ده انسانام
دیلیم وارخلقیم وار یوردوم یووام وار
یئردن چیخمامیشام گوبه لک کیمی
آدامام حققیم وار ائلیم اوبام وار
قول یرانمامیشام یاراناندا من
هئچ کسه المارام نه قول نه اسیر
قورتولوش عصریدیر انسانا بو عصیر
اسیر اولانلارد بوخوون کسیر
بولوت قاراچورلو (سهند)
بهجت آباد خاطره سی
اولدوز سایاراق گؤزله میشم هر گئجه یاری
گئج گلمه ده دیر یار, یئنه اولموش گئجه یاری
گؤزلر آسیلی, یوخ نه قارالتی, نه ده بیر سس
باتمیش قولاغیم گؤر نه دوشورمکده دی داری
بیرقوش آییغام سؤیله یه رک گاهدان اییلده ر
گاهدان اونو دا یئل دئیه لای لای, هوش آپاری
یاتمیش هامی, بیر آللاه اویاقدیر داها بیر من
مندن آشاغی کیمسه یوخ, اونداندا یوخاری
قورخوم بودو یار گلمه یه, بیردن یاریلا صوبح
باغریم یاریلار, صوبحوم آچیلما! سنی تاری
دان اولدوزو ایسته ر چیخا, گؤز یالواری چیخما
او چیخماسا دا اولدوزومون یوخدوچیخاری
گلمه ز, تانیرام بختیمی, ایندی آغارار صوبح
قاش بؤیله آغاردیقجا, داها باش داآغاری
عئشق’ین کی قراریندا وفا اولمایاجاقمیش
بیلمه م کی طبیعت نییه قویموش بوقراری
سانکی خوروزون سون بانی خنجردی سوخولدو
سینه مده اوره ک وارسا کسیب قیردی داماری
ریشخندله قیرجاندی سحر سؤیله دی: دورما
جان قورخوسو وار عئشقین, اوتوزدون بوقوماری
اولدوم قارا گون آیریلالی او ساری تئلدن
بونجا قارا گونلردی ائده ن رنگیمی ساری
گؤز یاشلاری هر یئردن آخارسا منی توشلار
دریایا باخار, بللیدی چایلارین آخاری
از بس منی یاپراق کیمی هیجرانلا سارالدیب
باخسان اوزونه سانکی قیزیل گولدو, قیزاری
مئحراب-ی شفقده اؤزومو سجده ده گؤردوم
قان ایچره غمیم یوخ, اوزوم اولسون سنه ساری
عئشقی واریدی شهرییار’ین گوللو چیچکلی
افسوس قارا یئل اسدی, خزان اولدوباهاری
استاد شهریار